நிஷா அக்கா நீ ரெம்ப அழகானவள். உன் மேடைகள் உன் அதிஸ்ரங்கள் அல்ல. உன் கடின உழைப்பிற்கான பரிசுகள் அவை. ஒருகாலத்தில் நீ வளர்ந்து கொண்டிருந்தவள். ஆனால் இப்போது நீ வளர்ந்து விட்டவள். ஒரு கலைஞனின் வளர்ச்சிக்கு எல்லையேது என நீ வாதிடக்கூடும். அனாலும் நீ கணிசமான அளவு வளர்ந்துவிட்டவள்தான். இப்போது உனக்கு சமூகப் பொறுப்புகள் அதிகம்.
நீ வளர்ந்து கொண்டிருந்த காலங்களில் உன் அழகிய கருமை நிறத்தை நகைச்சுவைப் பொருளாக்கி நிகழ்ச்சி செய்தாய். நடுவர்கள், சகபோட்டியாளர்கள், விருந்தினர்கள், பேட்டி காண்பவர்கள் அனைவரும் உன் நிறத்தை வைத்து நகைச்சுவை செய்ய அனுமதித்தாய். அதை நான் கூட ரசித்திருக்கிறேன். இப்போது நீ நன்றாக வளர்ந்து விட்ட பின்பும் இந்த நகைச்சுவை தேவையா? கொஞ்சம் யோசி. தமிழ் பேசுகின்ற அத்தனை கருப்பு அழகிகளினதும் பிரதிநிதி நீ. ஏனைய கருப்பு அழகிகளுக்கு கிடைக்காத மேடை உனக்கு கிடைத்திருக்கிறது. இந்த மேடையை நீ சரியாகப் பயன்படுத்த வேண்டிய தருணம் இது. கருப்பு என்பது மிகவும் அழகானது என்பதை நீ வலியுறுத்த வேண்டிய காலம் வந்துவிட்டது. உன் சுயநலத்துக்காக இதை நீ நகைச்சுவை பொருளாகும் போது ஏனைய கறுப்பழகிகளின் உள்ளம் காயப்பட்ட வாய்ப்பிருக்கிறதல்லவா? விசேடமாக குழந்தைகள் பருவ வயதுப் பெண்பிள்ளைகள் உள்ளம் வாடத்தானே செய்வார்கள். அவர்களின் தன்னம்பிக்கை சிதைந்து போகுமே.
அவர்களின் தன்னம்பிக்கையை கட்டி எழுப்புகின்ற கருவியாக உன்னை நீ மாற்றிக்கொள்ள மாட்டாயா நிஷா அக்கா
கருப்பு என்பது அழகின்மை என்னும் மனப்பான்மையை நீ உன் மேடைகளினுடாக மாற்ற வேண்டும் .
No comments:
Post a Comment